UL CLUB AL SA PRESENTA di Olimpio Panzera CAT CICLO AMATORI TICINO 1975-2001

Il 2000 l'è cuinciduu cun l'aniversari di 25 ann dal nos CLUB.

La storia la cumincia in dal'utobar dal 1975 da un grupp da soci cicloamaduu cun in tèsta ul Andrè Rossel che le pö diventä ul prim president dal sudalizi.

Ciclo Amatori Ticino perché? Perché un quai pedaladuu cantonal la furmaa ul prim comitato cunt i soci fondatori Blanc/ Rima/ Belotti/ Balascio/ Ratti/ Ortelli/ Kühne e ul poru Gigi Bernasconi che a'l ga pö vüt l' idea dala prima maia sucial cun i culur giald-ross-bleu, i culur ie restaa tai e quai, ghe cambiaa ul mudell vari volt.

L'idea l'eva apunto da tiraa inzema i ciclisti da pùssé part dal Canton Tisin, eco ul perché dal nom dala nosa sucietà.

Per i prim ann a sa urganizzava mia da gar cantunai, l'è stai quand che ghe rivaa in dal comitato ul Franco Barboncini che l'è pö diventà president in dal 1980 e che la urganizzà la prima gara Cantunal par i CAT cun la cronoscalada da Camp Blegn-Luzzon.

Però già in dal 1979 sa organizzava ul campionà sucial, gar che da ann in ann i se ripetütt in di vari region, in dala zona da Murco e Granscia al Malcanton e anca in dal Sopraceneri in cumbinazion cun la SSC Tenero-Gordola. e dal 1991 cun la cronometro dal Vedecc.

La nosa perla in tütt i casi a l'è la Biogg-Cademari, clasica in salida che quest'ann l'è ala 20 edizion, gara che l'è in dal calendari di Cicloamaduu dal 1982. Ghem sempru vütt una bela partecipazion da curiduu che i rivava da tücc i part, dal'Italia, dal Grison e anca dal'Alsazia un quai ann fa.

Emm urganizzà fina al 1984 la Cadempino-Ison belisima gara che l'a sempru riscuntraa tantu interess e sem sempru stai furtunaa in di 11 edizion cun ul bel temp!

In tücc isti ann chi emm organizzà diversi itinerari cui pass in di alp in vari region dala Svizzera, e dal 1999 emigrum anca all'estur a la fin da lui, traversum ul Stelvio-Foscagno-Bernina, invece in dal 2000 a semm nai in Francia al'Alp d'Huez-Galibier-Telegraf par mia perd l'abitudin ai salid, percurs mitici e indescrivibii talment iè bei dal gir d'Italia e da la Francia.

Podum anca definis in dal'Associazione Ticinese Cicloamatori -ATC-, cumè la sucietà pùsé vegia affiliada.

Ul numar di nos soci atualment a l'è da ca. 55/60 mentre in di ann vutanta a sevumm multi puséé.

Diversi di nos soci che dess i garegia pù, i vari Rossel/ Giurin/ Paggi/ A.Bossi/ Blanc/Ratti/ Soldini e altri che ian unuraa i culur cun i vincit, senza discmentiga i gar a crunometro a squadri vingiut dal nos club che ieva urganizza in di ann passat.

Quindi cum'é president dal 1983 a ringrazi tücc i vari soci che ie stai sota ai nos culur suciai e ie stai davera tanti che in 25 ann a riesci gnanca a elencai tücc.